Жол ҳәрекети қәўипсизлиги күнин өткериў ҳәм жол-транспорт ҳәдийселери профилактикасының нәтийжелилигин арттырыў илажлары ҳаққындағы Ҳүкиметлик қарар қабыл етилди. Бул ҳаққында Әдиллик министрлигиниң «Ҳуқуқий ахборот» каналы хабар бермекте.
«Жол ҳәрекети қәўипсизлигин үгит-нәсиятлаў күни» шеңберинде әмелге асырылып атырған илажларды қадағалаў, мониторингин алып барыў, сондай-ақ, ўәкилликли органлар ҳәм мәкемелердиң жумысларын муўапықластырыў Ҳуқықбузарлықлар профилактикасы ҳәм жынаятшылыққа қарсы гүресиў бойынша республикалық мәкемелер аралық комиссиясы тәрепинен әмелге асырылады.
Қарарға муўапық, «Жол ҳәрекети қәўипсизлигин үгит-нәсиятлаў күни»н өткериў бойынша бағдарлама тастыйықланды.
Сондай-ақ, усы ҳүжжет тийкарында Ишки ислер министрлигиниң тийисли шөлкемлер менен биргеликте кең жәмийетшилик қатнасыўында ҳәр айдың үшинши жума күнинде «Автомобильсиз күн» акциясы өткерилиўин жолға қойыў белгиленди.
Сондай-ақ, Халық билимлендириў министрлигине тийисли министрликлер менен биргеликте «Өмир қәўипсизлиги» мәжбүрий пәнин енгизиў бағдарламаларын ислеп шығыў ўазыйпасы жүклетилди.
Ислам Матеков.
Сайтымыздың телеграмдағы каналына ағза болың: https://t.me/karinformuz
