Карьерасындағы соңғы беллесиўде Усейн Болт финишқа жете алмады (видео)

Ямайкалы белгили атлет Усейн Болт өз карьерасындағы соңғы беллесиўди сәтсиз жуўмақлады. Лондонда болып атырған жәҳән чемпионатында спортшы командалық эстафетада финишқа жете алмады. Сегиз мәрте Олимпиада чемпионы эстафетада төртинши болып жуўырып, финиш сызығын кесип өтиўи керек еди. Бирақ, Усейн бирден тоқтап, жарысты даўам еттире алмады. Мағлыўматларға қарағанда, оның булшық етлери тартылып қалған.
Усейн Болт Лондондағы жәҳән чемпионатынан соң өз карьерасын тоқтатыўы ҳаққында айтып өткен. Ямайкалы спортшы сегиз мәрте Олимпиада чемпионы болып ғана қалмай, он бир мәрте жәҳән чемпионы болған. Сегиз мәрте дүнья рекордын жаңалаған. 100 ҳәм 200 метрге жуўырыўда ең күшли спортшы деп тән алынған.



Ислам Матеков.