«Ардақлаў» сыйлығына мүнәсип деп табылған ҳаял-қыз журналистлер

Қарақалпақстан Республикасы Жоқарғы Кеңеси, Министрлер Кеңесиниң қоллап-қуўатлаўында Мәденият министрлиги тәрепинен өткерилетуғын «Ардақлаў» сыйлығының ийеси болған журналист ҳаял-қызлардың өмири ҳәм мийнет жолы ҳаққында мағлыўмат бермекшимиз.

ӘНЖИМ БЕКБЕРГЕНОВА – Қарақалпақстан Республикасына мийнети сиңген журналист, «Алтын қәлем» Миллий сыйлығының ийеси, Қарақалпақстан телеканалының аға редакторы.



Мийнет жолын 1995-жылы «Арал ҳаўазы» газетасынан баслады. 1997-2006-жыллары Қарақалпақстан радиоканалында редактор, 2006-жылдан аға редактор болып ислеп келмекте. 1994-жылдан Өзбекстан Журналистлер аўқамының ағзасы. 1996-жылы «Пал балам» китабы баспадан шықты. 2014-жылы «Ардақлаў» сыйлығының «Жылдың ең жақсы тележурналисти» номинациясы, 2015-жылы «Дияр» телеканалына «Ең көп ҳәм ең мазмунлы көрсетиў таярлаған тележурналист» номинациясы, 2015-жылы «Алтын қәлем» Миллий таңлаўының «Ең жақсы телематериал» номинациясы жеңимпазы деп табылды. 2016-жылы «Қарақалпақстан Республикасы Халық билимлендириў ағласы» көкирек нышаны, 2017-жылы «Қарақалпақстан Республикасына мийнети сиңген журналист» атағына мүнәсип болды. Бүгинги күнде «Саз ҳәм ҳаўаз» ток шоу, «Өмир ибратлары», «Меҳир», «Әдеплер ғәзийнеси» көрсетиўлерин таярлап келмекте.

НУРСУЛЫЎ БЕГИМОВА – Қарақалпақстан радиоканалында бас редактор.



Мийнет жолын «Еркин Қарақалпақстан» газетасында арнаўлы хабаршы болыўдан баслады. 1991-жылдан Қарақалпақстан радиоканалында редактор, бөлим баслығы, бас редактор лаўазымларында ислеп келмекте. «Өзбекстан Республикасы ғәрезсизлигиниң 10 жыллығы» көкирек нышаны, 2014-жылы «Ардақлаў» сыйлығы менен сыйлықланды. «Аға бий» радиосериалына редакторлық етти. Бүгинги күнде «Дәўир ҳәм сиясат», «Турмыс тәшўишлери», «Адам ҳәм нызам», «Ибрат» еситтириўлериниң редакторы.

ПЕРДЕГҮЛ ХОЖАМУРАТОВА – Қарақалпақстан Республикасына мийнети сиңген журналист.



Мийнет жолын 1985-жылдан Бозатаў районлық «Ылғыллы мийнет» газетасынан баслады. 1990-жылдан «Нөкис ҳақыйқаты», 1999-жылдан «Еркин Қарақалпақстан» газетасында жумыс иследи. Мақалаларын П.Меңлимуратова аты менен де жәриялайды. «Ғалаба хабар қураллары ҳәм сайлаў процеси» таңлаўының, 2004-жылы «Жылдың ең белсенди журналисти», 2005-жылы «Әтиргүл» таңлаўларының жеңимпазы болды. «Өзбекстан Республикасы ғәрезсизлигиниң 20 жыллығы» көкирек нышаны, 2015-жылы «Ардақлаў» сыйлығы, 2016-жылы «Қарақалпақстан халық билимлендириў ағласы» көкирек нышаны, 2018-жылы «Қарақалпақстан Республикасына мийнети сиңген журналист» атақларына мүнәсип деп табылды. 2018-жылы «Ана сағынышы» китабы баспадан шықты. Бүгинги күнде мийнет дем алысында.

ЗУХРА ИСАКОВА - «Жеткиншек» газетасында бөлим баслығы.



2000-жылдан «Жеткиншек» газетасында хабаршы, бөлим баслығы болып ислеп келмекте. 2015-жылы «Ардақлаў» сыйлығының «Жылдың ең жақсы журналисти» номинациясы жеңимпазы болды. 2016-жылы «Саламат ана-бахытлы бала» таңлаўында биринши орынды ийеледи.

АМИНА ҚУРБАНИЯЗОВА – Қарақалпақстан телеканалының комментаторы.



2000-жылдан Қарақалпақстан телеканалы, 2008-жылдан «Ёшлар» телеканалының Қарақалпақстан Республикасындағы хабаршысы болды. 2009-жылдан «Ёшлар» телеканалында «Қарақалпақ жаслары» көрсетиўин қарақалпақ тилинде турақлы түрде таярлап келмекте. 2013-жылы «Мениң қәлбим айдан да бәлент» қосықлар топламы баспадан шықты. 2015-жылы «Ардақлаў» сыйлығының, 2018-жылы «Хошамет» сыйлығының «Жылдың ең жақсы тележурналисти» номинациясы жеңимпазы болды.

НАЗИЙРА ЖАҚСЫМУРАТОВА - Қарақалпақстан телерадиокомпаниясы директор орынбасары.



Мийнет жолын 2002-жыл Қарақалпақтан телеканалында редакторлықтан баслады. «Тикенсиз кирпитикенлер» фильми ҳәм Қарақалпақстан телеканалындағы дәслепки «Бир достың болсын…» телесериалына редакторлық етти. «Дубляж» студиясындағы ҳүжжетли фильмлердиң қарақалпақ тилине аўдармаланыўына басшылық етти. 2013-жылдан Қарақалпақстан Телерадиокомпаниясы директор орынбасары лаўазымында ислеп келмекте. 2016-жылы «Ардақлаў» сыйлығының «Пидайы мийнетлери ушын» номинациясы, «Қарақалпақстан халық билимлендириў ағласы», 2017-жылы «Қарақалпақстан Республикасы Конституциясының 25 жыллығы» көкирек нышаны менен сыйлықланды.

ЛАЛА СЕЙДАНОВА – Қарақалпақстан телеканалында бас редактор.



Мийнет жолын 1994-жылы Қарақалпақстан телеканалында «Балалар ҳәм жаслар ушын көрсетиўлер редакциясы»нда редактор болыўдан баслады. 2002-жылдан аға редактор, 2013-жылдан бас редактор болды. 2016-жылы «МТРК соврини» таңлаўында «Жыл бағдарламасы сәўлелендирилген ең жақсы көрсетиў» номинациясы бойынша жеңимпаз болды. 2017-жылы «Ардақлаў» сыйлығына «Ең жақсы телебаслаўшы» номинациясына мүнәсип деп табылды.

Сахибжамал Есемуратова