Жумыссызлық напақасының муғдары көбейтиледи

Өзбекстанда жумыссызлық напақасы мийнетке ҳақы төлеўдиң ең кем муғдарына теңлестирилген ҳалда көбейтиледи. Бул ҳаққында бәнтлик ҳәм мийнет қатнасықлары министри Шерзод Кудбиев хабар берди, деп жазады Kun.uz.
Хабарда жазылыўынша, ҳәзирги ўақытта 577 172 сумды қурайтуғын мийнетке ҳақы төлеўдиң ең кем муғдары орнына «базалық есаплаў өлшеми» термини енгизиледи.
- Ҳәзирги ўақытта жумыссызлық напақасын мийнетке ҳақы төлеўдиң ең кем муғдары дәрежесине шекем көбейтип атырмыз. Бул көрсеткишти базалық есаплаў өлшеми деп атаймыз. Мәмлекет халық алдындағы конституциялық миннетлемесин орынлаўы ушын адамларды жумыс пенен тәмийинлеўимиз керек. Буны орынлай алмасақ, напақа төлеўимиз шәрт. Экономикалық рычаг ислеўи ушын жумыссызлық напақасын көбейтиўимиз керек, - деп айтып өткен Кудбиев.
Соның менен бирге, министр ҳәзирги ўақытта «экономикалық функциясын орынламай атырғаны» себепли дерлик ҳеш ким жумыссызлық напақасын сорап мүрәжат етпей атырғанын атап өтти. Напақа өндириўге ерискенлер болса «тийкарынан ең кем мийнет ҳақыға тең муғдарда – 202 730 сум» напақа алмақта.

Ислам Матеков.

Сайтымыздың телеграмдағы каналына ағза болың: https://t.me/karinformuz