Электрон мийнет дәптершелери қашаннан баслап әмелиятқа енгизелетуғыны мәлим болды

Өзбекстан Бәнтлик ҳәм мийнет қатнасықлары министрлиги мийнет қатнасықларын электрон формаға өткериў имканиятын беретуғын бирден-бир миллий системаны ислеп шығыў бойынша жумыс алып бармақта. Бул ҳаққында Kun.uz хабар берди.
- Системаны 1-июньнан баслап иске түсириўге ҳәрекет етип атырмыз. Быйыл барлық жумыс бериўшилер мийнет қатнасықларын усы электрон система тийкарында рәсмийлестириўи шәрт болады. Ҳәр қандай мийнет шәртнамасы, оның бийкарланыўы, бир лаўазымнан басқасына өткериў усы жерде рәсмийлестириледи, - деп айтып өткен министр.
Хабарда жазылыўынша, министрлик системаны сынақтан өткермекте. Қәлеген кәрхана бул системаны сынап көриўи ҳәм анықланған кемшиликлер ҳаққында министрликти хабардар етиўи мүмкин. Система рәсмий түрде иске түсиўинен алдын оған киргизилген барлық мағлыўматлар өшириледи.
Министрдиң атап өтиўинше, мийнет шәртнамасы система арқалы рәсмийлестириледи. Болмаса мийнет қатнасықлары болмайды. Хызметкердиң телефонына СМС хабар арқалы келген тастыйықлаўшы код киргизилгенинен соң шәртнамаға қол қойылған болады. Юридикалық шахстың таңбасы сыпатында болса электрон санлы таңба хызмет етеди.
- Мийнет шәртнамасы мәмлекетлик тилде дүзиледи. Шәртнамалар автоматластырылған тәризде номерленеди. Номерлер қайталанбайды. Барлық мийнет шәртнамалары тәртип бойынша номерленеди, яғный ҳәзир Ташкентте, кейингиси Хорезмде, соңынан Әндижанда, - деп айтып өтти министр Кудбиев.
Усы тәризде мийнет шәртнамаларының электрон базасы қәлиплеседи, бул болса өз гезегинде, мийнет дәптершелериниң электрон базасын қәлиплестиреди. Пенсия есаплаўда буллстема тийкарғы мағлыўматлар базасы болады.

Ислам Матеков.

Сайтымыздың телеграмдағы каналына ағза болың: https://t.me/karinformuz