Берунийли мектеп оқыўшылары Ферғана ашық бириншилигинде 2-орынды ийеледи

Усы жылдың 12-14-апрель күнлери Ферғана ўәлаяты Бағдад районында спорттың волейбол түри бойынша 2003-2004-жыллары туўылған жас өспиримлер арасында ашық турнир өткерилди.
Оған Ферғана, Жиззақ, Сурхандәрья, Ташкент, Сырдәрья, Наўайы ўәлаятларынан, Қоқанд қаласынан, сондай-ақ, Қарақалпақстан Республикасынан Беруний районы 38-санлы улыўма билим бериў мектеби сайланды командасы қатнасты.
Өзбекстан Республикасы Президенти қарары тийкарында тастыйықланған ғалабалық спортты еледе раўажландырыў бағдарламасына муўапық шөлкемлестирилген турнир «Биз – уллы Ўатан перзентлеримиз!» сүрени менен жоқары дәрежеде өткерилди.

Турнирде республикамыз атынан қатнасқан берунийли жас спортшылар жақсы ҳәрекет етип, финалға шекем барлық қарсыласларын жеңип шықты. Финалда оларға бираз әўмет жетиспеди ҳәм турнир жуўмағына бола сыйлы 2-орынды ийеледи.
Бул ҳаққында бизге Қарақалпақ мәмлекетлик университети магистранты Сәкен Сердалиев хабар берди.

Ислам Матеков.

Сайтымыздың телеграмдағы каналына ағза болың: https://t.me/karinformuz