Париждеги дүньяға белгили Нотр Дам ширкеўи өртенип кетти (видео)

Франция дегенде көз алдымызға Нотр Дам, Эйфель минарасы, Мона Лиза, бордо шарабы, фуа-гра тағамы, шырайлы дүканлар, аккордеон, Напалеон, Ален Делон, импрессионистлер, Жанна д’Арклар келеди.
Усы дизимниң басында турған Нотр Дам Эйфель минарасынан да қунлы ғәзийне, француз миллети тарийхының жанлы гүўасы болып табылады.
15-апрель күни кеште усы ширкеўде өрт келип шықты. Жеделлик пенен жетип келген өрт өшириўшилер бир неше саат ишинде өртти сапластырғаны менен, ширкеўдиң бир бөлеги жанып кетип, минарасы қулап түсти.

Ўақыя орнына жетип келген президент Эммануэль Макрон:
- Мен усы гәплеримди барлық француз елине арнағым келеди. Нотр Дам – бизиң тарийхымыз, әдебиятымыз, қыял-әрманымыз. Ол биз бенен бирге эпидемияны да, урысларды да, ғәрзесизликке ерискенимизди де көрди. Ол бизиң өмиримиздиң эпицентри, - деп алдағы ўақытлары оны қайта тиклеў ушын барлық күш-жигерин сарплайтуғынлығын билдирди.


Ислам Матеков.

Сайтымыздың телеграмдағы каналына ағза болың: https://t.me/karinformuz