World Press Photo таңлаўындағы ең жақсы фото жәрияланды

Фотограф Джон Мурдың АҚШ ҳәм Мексика шегарасында түсирген «Жылап турған гондураслы қыз» фотосүўрети World Press Photo таңлаўында жеңимпаз деп табылды.
Сүўретте қыздың анасы Сандра Сенчести шегарашы тексерип атырғанда, жылап турған кишкене қыз – Янела сәўлеленген. Сандра Санчес қызы менен бирге АҚШтан қоным табыў ушын Орайлық Америка, Мексика арқалы 1 ай жол жол жүрген.
Бул хабар шыққаннан соң АҚШ шегара хызмети шегараны кесип өтпекши болған мыңлаған мигрантлар арасында ана ҳәм бала болмағанын билдирген.
Мағлыўмат ушын, World Press Photo фотожурналистика тараўындағы белгили, ең үлкен сыйлық болып табылады. 2019-жылғы таңлаўға 4738 фотожурналист қатнасып, 78801 фотосүўрет келип түскен.
Ең қызықлы тәрепи сонда, Джон Мур усы күнге шекем 6 материкте, 65 мәмлекетте болып, ол жерлердеги тыныш өмирди сүўретке түсирип келген. 2008-жылдан берли оның баслы темасы – иммигрантлар. 2005-жылы Пулитцер сыйлығын алған ҳәм басқа да бир неше сыйлықлардың лауреаты есапланады.

Ислам Матеков.

Сайтымыздың телеграмдағы каналына ағза болың: https://t.me/karinformuz