Тақыятаста 66 жумысшының мийнет ҳақысы берилмеди. Мәжбүрий орынлаў бюросы оларды өндирип берди

Мәжбүрий орынлаў бюросы Қарақалпақстан Республикалық басқармасы Тақыятас районлық бөлимине усы жылдың 4-апрель күни пуқаралық ислери бойынша Нөкис районлар аралық судынан «Тақыятасгидроэнергоқурылыс» унитар кәрханасынан 66 жумысшының айлық мийнет ҳақыларын өндирип бериў бойынша орынлаў ҳүжжети келип түсти.
Ҳүжжеттиң орынланыўын тәмийинлеў мақсетинде районлық бөлимниң мәмлекетлик орынлаўшылары тәрепинен тийисли тәртипте мәжбүрий орынлаў ҳәрекетлери алып барылды.
Атап айтқанда, 11-апрель күни 46 хызметкерге 45 556 998 сум өндирилип, орынлаў ҳүжжети «Суд ҳүжжетлери ҳәм басқа уйымлар ҳүжжетлерин орынлаў ҳаққында»ғы Нызамның 41-статьясына тийкарланып өз жумысын тоқтатты.
Қалған 20 орынлаў ҳүжжети бойынша ҳәр бири 890 000 сумнан, жәми 17 800 000 сум өндирилген болса, улыўма орынлаў ҳәрекетлери нәтийжесинде 66 жумысшыға 63 356 998 сум өндирип берилди.

Ислам Матеков.

Сайтымыздың телеграмдағы каналына ағза болың: https://t.me/karinformuz