![](\"http://img.uz/d/2019/04/5cc04acb129cf.jpg\")
Алдын хабар бергенимиздей, усы жылдың 22-апрель күни Қарақалпақ мәмлекетлик университетинде «Глобалласыў процесинде ғалаба хабар қуралларының роли» атамасындағы миллий журналистикамыз тарийхындағы биринши илимий-теориялық конференция болып өтти.
Конференцияға Украинаның Киев миллий мәденият ҳәм көркем өнер университети, Қырғызстанның Ош мәмлекетлик университети, Бухара мәмлекетлик университети ҳәм Жәҳән экономикасы ҳәм дипломатиялық университетинен профессорлар, илимий излениўшилер келип, илаж шеңберинде олардың Мойнақ районына сапары шөлкемлестирилиўи жобаластырылған еди.
23-апрель күни конференция шөлкемлестириўшилери ҳәм бир топар мийманлар Мойнақ районында болды. Сапар Ҳәким ата – Сулайман Бақырғаный, Әжинияз Қосыбай улы сыяқлы теберик инсанлардың қойымшылықларын зыяратлаўдан басланды. Соңынан мийманлар райондағы Үшсай аўыл пуқаралар жыйыны аймағындағы улыўма билим бериў мектебине барып, оқыўшылар менен ушырасыў өткерди ҳәм оларға көркем-әдебий, илимий бағдардағы китапларды саўға етти.
Буннан соң олар райондағы дүньяға белгили «Корабльлер қойымшылығы» ҳәм Мойнақ маягына барып, бул жерлерде әмелге асырылып атырған қурылыс ҳәм абаданластырыў жумыслары менен жақыннан танысты.
Сапар райондағы Экологиялық музей, жаңадан қурып питкерилген «Арал» стадионы, мәденият сарайы, орайлық амфитеатр ҳәм өнерментлер аллеясы, сондай-ақ, сельфи объектлерине саяхатлар менен даўам етти.
Мийманлар дүнья жүзинде экологиялық апатшылықлар орайы деп есапланатуғын Мойнақтың бүгинги шырай ашып атырған келбетин көрип, бул жердиң келешеги жарқын екенлигин айрықша атап өтти.
Солай етип, жобаластырылған сапар өз жуўмағына жетти.
Ислам Матеков.
Сайтымыздың телеграмдағы каналына ағза болың: https://t.me/karinformuz
