2018-жылдағы жәҳән чемпионатының тобы қандай болады?

Футбол бойынша ҳәр төрт жылдан бир өткерилетуғын жәҳән чемпионаты ҳәр қыйлы өзгешеликлери менен ядта қалады. Шөлкемлестирилиўи, стадионлар ҳәм олардағы байрам тамашалары, қызғын беллесиўлер ҳәм әжайып голлар тамашагөйлердиң ядында көп ўақытқа шекем сақланып қалады. Ҳәр бир чемпионаттың тийкарғы символларының бири топ екенлиги белгили. Футбол жанкүйерлери ҳәр чемпионаттың топларын бир-биринен ажыратып отырады. «+Teamgeist», «Jabulani» ҳәм «Brazuca»ны жақсы биледи. Ал, 2018-жылы Россияда болып өтетуғын жәҳән чемпионатының тобы қандай болады?



Социаллық тармақларда усы чемпионат ушын «Adidas» фирмасы тәрепинен арнаўлы ислеп шығылған топтың сүўретлери пайда болды. Мағлыўматларға қарағанда, топты расмий түрде таныстырыў 9-ноябрь күни болып өтеди.
Мағлыўмат ушын, усы күнге шекем келеси жылы мундиалда қатнасатуғын 23 сайланды команданың аты белгили болды. Олар арасында Исландия ҳәм Панама сайланды командалары өз тарийхында биринши мәрте мундиалда қатнасады. Чемпионат 2018-жылдың 14-июнь – 15-июль күнлери аралығында болып өтеди.

Ислам Матеков.