Әжинияз атындағы Нөкис мәмлекетлик педагогикалық институтының Елликқаладағы педагогика факультетиниң рәсмий ашылыў салтанаты болып өтти.
Факультет қурамы анық ҳәм тәбийғый пәнлер кафедрасы және социаллық ҳәм гуманитар пәнлер кафедрасынан ибарат болып, бул жерде инглис тили ҳәм әдебияты, математиканы оқытыў методикасы, өзбек тили ҳәм әдебияты және дене тәрбиясы бакалавр билимлендириў бағдарлары бойынша жетик педагог кадрлар таярлаў жумыслары жолға қойылмақта.
Ашылыў салтанатында институт басшылары, профессор-оқытыўшылар, студентлер және олардың ата-аналары, кең жәмийетшилик ўәкиллери қатнасты.
Еслетип өтемиз, Өзбекстан Республикасы Президентиниң 2017-жыл 26-сентябрьдеги «Жоқары билимлендириў мәкемелерине кириў ушын талабанларды мақсетли таярлаў системасын буннан былай да жетилистириў илажлары ҳаққында»ғы ПҚ-3290-санлы қарарында белгиленген тапсырмалардың орынланыўын тәмийинлеў және студентлердиң турақлы жасаў орынларына жақын болған аймақта билим алыўы ушын қолайлы шараятлар жаратыў мақсетинде Өзбекстан Республикасы Жоқары ҳәм орта арнаўлы билимлендириў министрлигиниң 2019-жыл 24-июль күнги №669 буйрығы тийкарында Әжинияз атындағы Нөкис мәмлекетлик педагогикалық институтының Елликқала педагогика факультети шөлкемлестирилди.
Факультетте Елликқала районы ҳәм оған жақын аймақларда жасайтуғын студентлер билим алып, Қарақалпақстанның қубла районлары және Хорезм, Бухара ўәлаятлары ушын педагог кадрлар таярлаўда үлкен әҳмийетке ийе болыўы күтилмекте.
Ашылыў салтанатына Қарақалпақстан Республикасы Жоқарғы Кеңеси Баслығының орынбасары А.Ҳамраев қатнасты.
Ислам Матеков.
Сайтымыздың телеграмдағы каналына ағза болың: https://t.me/karinformuz
