Ажиниёз номидаги Нукус давлат педагогика институти Евроосиё педагогика университетлари ассоциацияси аъзосига айланди, дея хабар қилди НДПИ ахборот хизмати.
Мазкур тадбир институт ректорининг Москва педагогика давлат университети (МПДУ)га ташрифи давомида амалга оширилди.
Евроосиё педагогика университетлари ассоциацияси (ЕПУА) 2015 йилда Олмати шаҳрида МҲД давлатлари педагогик университетлари ректорлари йиғилишида таъсис этилган. Таъсис шартномалари 48та университетлар томонидан имзоланган.
Ассоциациянинг таъсисчилари МПДУ ва Абай номидаги Қозоқ миллий педагогик университети ҳисобланади.
Ассоциация нотижорат ташкилот ҳисобланиб, унинг таркибига Евросиё минтақасидаги, жумладан Ўзбекистон, Қирғизистон, Беларус, Қозоғистон, Арманистон ва Россия давлатларидаги олий ўқув юртлари кириши мумкин.
Ташкилотнинг асосий фаолияти қуйидагича:
- МДҲ давлатларидаги Ассоциацияга аъзо бўлган университетлар ўртасида халқаро ҳамкорликни ташкил қилиш ва педагогик таълимни ривожлантириш;
- Аъзо университетларда таълим дастури ва илмий тадқиқотлар сифатини ошириш;
- педагогик ва илмий-педагогик кадрларни тайёрлашда, фундаментал илмий тадқиқотларни кенгайтиришда ҳар хил манбалардан молиявий ва моддий ресурсларни жалб қилиш;
- Аъзо университетлардаги талабалар, аспирантлар, ўқитувчилар ва бошқа категориядаги ходимларнинг социал ривожланишига қаратилган масалаларни ҳал қилиш;
- Аъзо университетлар ўртасида таълим, фан, маданият, экология, халқаро хавфсизлик ва социал прогресс соҳаларида ҳамкорлик ўрнатиш;
- Педагогик таълим ва педагогик университетларда илмий тадқиқотлар ўтказиш борасида халқаро сифат стандартларини фойдаланиш;
- Педагогик таълим тизимида ягона ахборот маконини ривожлантириш.
Ассоциациянинг президенти МПДУ ректори ҳисобланади.
Сайтимизнинг телеграмдаги каналига аъзо бўлинг: https://t.me/karinformuz
