Ташкент қаласындағы Әлийшер Наўайы атындағы Өзбекстан мәмлекетлик академиялық үлкен театрында «O‘zbegim ayoli – 2020» Миллий сыйлығын салтанатлы тапсырыўға бағышланған илаж болып өтти. Бул ҳаққында ӨзА хабар берди.
Усы мүнәсибет пенен театр сарайына министрликлер ҳәм уйымлар, дөретиўшилик ҳәм жәмийетлик шөлкемлердиң ўәкиллери, аналар, ҳәр қыйлы тараўларда жемисли мийнет етип атырған ҳаял-қызлар мирәт етилди.
Быйылғы жылы усы сыйлық ушын болып өтетуғын таңлаўға мәмлекетимиздиң түрли аймақларында жасап атырған 100 ден аслам ҳаял-қызлардың ҳүжжетлери усынылды. Таңлаў жеңимпазларын анықлаўда олардың өрнек болатуғындай хызмети, пидәкерлиги, үлгили жақсы әмеллерине тийкарғы итибар қаратылды. Төрешилердиң жуўмақларына бола, олардың он бири жеңимпаз деп табылды.
«Дәўжүрек ҳаял» бағдарының жеңимпазы Қәлбийке Жийемуратова қаншадан-қанша нәрестелердиң аман-есен дүньяға келиўин тәмийинлеген. Акушеркадай оғада қәўетерли кәсипте ана ҳәм бала өмирин сақлап қалыўды муқаддес миннет, деп биледи.
– Елиў бир жылдан берли усы тараўда мийнет етпектемен, – деди Қ.Жиемуратова. – Мәмлекетимиз басшысының басламасы менен Мойнақта да мисли көрилмеген өзгерислер алып барылмақта. Булардың ҳәммеси кеўлимизге мақтаныш бағышлайды.
Мағлыўматларға қарағанда, Қәлбийке Жийемуратова өз мийнет жолы даўамында 41 мың баланың дүньяға келиўине хызмет еткен.
Илажда сыйлық ийелерине арнаўлы статуэтка, диплом ҳәм естелик саўғалары салтанатлы түрде тапсырылды.
Сайтымыздың телеграмдағы каналына ағза болың: https://t.me/karinformuz
