Усы жылдың 13-май күни өткерилген видеоселектор жыйналысында Өзбекстан Республикасы Президенти Ш.М.Мирзиёев тәрепинен эпидемиологиялық жағдайдың дизгинин беккем услаған ҳалда карантин талапларын жумсартыўды басқышпа-басқыш даўам еттириў арқалы экономикалық белсендиликти тиклеў және халықтың жумыс ислеўи ҳәм дәрамат алыўын тәмийинлеў бойынша әҳмийетли илажлар белгилеп берилген еди.
Атап айтқанда, «жасыл» ҳәм «сары» аймақларда санитариялық-гигиеналық талапларға қатаң түрде әмел еткен ҳалда хызмет көрсетиў түрлерине басқышпа-басқыш рухсат бериў мүмкинлиги атап өтилди.
Соның менен бирге, видеоселектор жыйналысында айырым жерлерде берилген еркинликти надурыс түсинип, халық, әсиресе, жаслар ҳеш қандай зәрүрликсиз көшелерди толтырып жүриў жағдайлары бақланып атырғаны көрсетип өтилди. Бундай жағдайлар және соңғы күнлерде инфекция жуқтырғанлар санының және көбейип атырғаны ҳәммемизди сергекликке шақырады.
Усыларды есапқа алып, Республикалық арнаўлы комиссияның 2020-жыл 14-майдағы қарары тийкарында әмелдеги карантин талаплары 2020-жылдың 1-июнь күнине шекем узайтылды.
Ислам Матеков.
Сайтымыздың телеграмдағы каналына ағза болың: https://t.me/karinformuz
