Усы жылдың 28-май – 1-июнь күнлери аралығында «Қызыл китап»қа киргизилген жорға туўалақ қуслары Қоңырат районындағы кеңисликлерге қойып жиберилди. Бул ҳаққында ҚР Экология ҳәм қоршаған орталықты қорғаў комитетиниң баспасөз хызмети хабар берди.
Хабарда жазылыўынша, Өзбекстан Республикасы Экология ҳәм қоршаған орталықты қорғаў мәмлекетлик комитети және «Falcon Hunting Solutions» компаниясы тәрепинен жоқ болып кетиў қәўпи астында турған 2040 бас жорға туўалақ қуслары район аймағындағы кеңисликлерге жиберилген.
Бул қуслар Бирлескен Араб Әмирликлериниң «International fund for houbara conservation» орайында көбейтилген.
Мағлыўмат ушын, жорға туўалақлар 2009-жылы Өзбекстан Қызыл китабына сийрек гезлесетуғын түр сыпатында киргизилген. Олар Қызылқум шөллеринде жасайды. Олардың саны ҳәм жасаў майданы 1960-жыллардан баслап азая баслаған.
Ислам Матеков.
Сайтымыздың телеграмдағы каналына ағза болың: https://t.me/karinformuz
