Өзбекстанда екинши ҳаялға үйлениўге рәсмий түрде рухсат берилгени ҳаққындағы хабарлар ҳақыйқатқа туўра келмейди, деп жазбақта «AntiFake.uz» телеграм каналы. Бул ҳаққында «Дарё» жазбақта.
Мәлим етилиўинше, социаллық тармақлар ҳәм Телеграм каналларында Өзбекстан Республикасы Министрлер Кабинетиниң 2020-жыл 17-ноябрьдеги ПҚ-3535-санлы қарарына муўапық, мәмлекетте екинши ҳаялға үйлениўге рухсат берилгени ҳаққындағы хабарлар тарқалмақта. Бул хабарлар өтирик ҳәм ҳақыйқатқа сәйкес келмейтуғынлығы мәлим етилди.
Хабарда халық арасында жалған мәлимлеме тарқатыў ушын жуўапкершилик бар екенлиги еслетип өтилген.
Мағлыўмат ушын, Өзбекстан Республикасы Жынаят кодексиниң 126-статьясына муўапық, көп ҳаяллы болыў, яғный улыўмалық турмыс тийкарында еки ямаса оннан аслам ҳаял менен ерли-зайыплы болып жасаў – базалық есаплаў муғдарының елиў есесинен жүз есесине шекемги муғдарда жәрийма ямаса үш жылға шекемги тәртип түзетиў жумыслары яки бир жылдан үш жылға шекемги еркинлигин шеклеў яки болмаса үш жылға шекемги еркинен айырыў менен жазаланады.
Сондай-ақ, Шаңарақ кодексиниң 16-статьясына муўапық, неке дүзиўде некелениўшилердиң биреўи басқа некеде болған жағдайда, рухсат етилмейтуғынлығы көрсетип өтилген.
Еслетип өтемиз, усы мазмундағы хабарлар усы жылдың май айында да тарқатылған ҳәм ҳақыйқатқа туўра келмейтуғынлығы мәлим етилген еди.
Ислам Матеков.
Сайтымыздың телеграмдағы каналына ағза болың: https://t.me/karinformuz
