«Ўзкоммуналлойиҳақурилиш» МУК тәрепинен берилген жуўмақларға муўапық, Нөкис қаласында 13 көп қабатлы турақ жайдың авариялық жағдайға келгенлиги анықланды ҳәм оларды бузыў (снос) бойынша жуўмақ ҳүжжетлери берилди. Бул ҳаққында қала ҳәкимлиги мәлимлеме хызмети хабар берди.
Нөкис қаласындағы авариялық жағдайдағы көп қабатлы турақ жайлар:
1. «Сәрбиназ» МПЖ аймағындағы Таң жулдызы (бурынғы Аманбаев) көшесиндеги 6 жай (2 қабатлы);
2. «Ғәрезсизлик» МПЖ аймағындағы Мийрас (бурынғы П.Тлегенов) көшесиндеги 1 жай (2 қабатлы);
3. «Қаратаў» МПЖ аймағындағы Кәрўан сарай (бурынғы Абай) көшесиндеги 6 жай (2 қабатлы).
Нөкис қаласы ҳәкимлиги усы көп қабатлы турақ жайларды бузып, орнына жаңа имаратлар тиклеў мақсетинде қурылыс кәрханалары арасында тендер таңлаўы өткерилетуғынлығын хабарлайды.
Оған қатнаспақшы болған қурылыс кәрханалары Нөкис қалалық ҳәкимлигиниң Қурылыс бөлимине 2021-жылдың 21-февраль күнине шекем хабарласыўы, 2021-жыл 25-февраль күни қурылыс кәрханалары арасында тендер таңлаўы өткерилетуғынлығы мәлим етилген.
Қосымша мағлыўматларды (61) 222-75-77 телефон номеринен алыўға болады.
Сайтымыздың телеграмдағы каналына ағза болың: https://t.me/karinformuz
