Бүгин, 19-октябрь күни Өзбекстан мусылманлары басқармасы Уламалар Кеңесиниң кеңейтилген мәжилиси болып өтти. Онда шөлкемлестириў мәселеси көрип шығылды. Ташкент қаласы бас имам-хатиби болып ислеп атырған Нуриддин Холиқназаров Өзбекстан мусылманлары басқармасы баслығы, муфтий лаўазымына сайланды. Бул ҳаққында «Nasiyat.uz» каналы хабар берди.
Нуриддин Холиқназаров 1968-жылы Әндижан ўәлаяты Асака қаласында туўылған. 1992-жыл Бухара ўәлаятындағы Мир Араб медресеси, 1998-жыл Имам Бухарий атындағы Ташкент ислам институтын, 2007-жылы болса Ферғана мәмлекетлик университетин табыслы тамамлаған.
Мийнет жолы даўамында Асака қаласындағы «Аҳмадали махдум» мешити имам-хатиби, Ташкент қаласы «Оқ тепа» жәмәәтлик мешити имам-хатиби, Ташкент қаласындағы «Кўкалдош», Әндижан ўәлаятындағы «Саййид Муҳйиддин махдум» медреселери оқытыўшысы, Әндижан ўәлаяты бас имам-хатиби ҳәм 2019-жылдан усы күнге шекем Ташкент қалалық бас имам-хатиби ўазыйпаларында мийнет етип келген.
Еслетип өтемиз, Өзбекстан мусылманлары басқармасының буннан алдынғы баслығы, муфтий Усманхан Алимов усы жылдың 15-август күни 71 жасында қайтыс болған еди.
Ол 2006-жылдан берли Өзбекстан мусылманлары басқармасының баслығы, муфтий лаўазымында ислеп киятырған еди.
Сайтымыздың телеграмдағы каналына ағза болың: https://t.me/karinformuz
