4-ноябрь күни Қарақалпақ мәмлекетлик жас тамашагөйлер театрында 11-ноябрь – Өзбекстан кәсиплик аўқамлары күни мүнәсибети менен Өзбекстан кәсиплик аўқамлары федерациясының Қарақалпақстан Кеңеси тәрепинен мәдений-ағартыўшылық илажы өткерилди. Бул ҳаққында ҚР Жоқарғы Кеңесиниң баспасөз хызмети хабар берди.
Илажда Қарақалпақстан Республикасы Жоқарғы Кеңесиниң Баслығы М.Камалов, министрлик ҳәм шөлкемлер басшылары, мийнет ветеранлары, кәсиплик аўқамлары белсендилери қатнасты.
Өзбекстан кәсиплик аўқамлары федерациясының Қарақалпақстан Кеңеси баслығы У.Жалменов илажды кирис сөз бенен ашты.
Салтанатлы илажда Қарақалпақстан Республикасы Жоқарғы Кеңесиниң Баслығы М.Камалов жыйналғанларды Өзбекстан кәсиплик аўқамлары күни мүнәсибети менен қызғын қутлықлады ҳәм ҳүрметли Президентимиз Шавкат Мирзиёев басшылығында кәсиплик аўқамлары хызметкерлерин ҳәр тәреплеме қоллап-қуўатлаў, олардың социаллық мийнет тараўындағы ҳуқықларын қорғаў, жумысын жетилистириўге итибар қаратылып атырғанлығын атап өтти.
2019-жыл 6-декабрь күни «Кәсиплик аўқамлары ҳаққында»ғы, 2020-жыл 23-ноябрь күни «Өзбекстан кәсиплик аўқамлары күнин белгилеў ҳаққында»ғы Өзбекстан Республикасы Нызамлары қабыл етилди. Бул жаңалық елимиздеги бес ярым миллионнан артық кәсиплик аўқамлары ағзалары тәрепинен жоқары ҳүрмет пенен күтип алынды.
Илажда Қарақалпақстан Республикасы Жоқарғы Кеңесиниң Баслығы М.Камалов 2021-жыл даўамында Өзбекстан кәсиплик аўқамлары федерациясының Қарақалпақстан Кеңеси тәрепинен өткерилген таңлаўлардың жеңимпазларын сыйлықлады.
Сондай-ақ, мийнет ветеранлары ҳәм кәсиплик аўқамлары белсендилери Өзбекстан кәсиплик аўқамлары күни белгиленгенлигиниң 1 жыллығы мүнәсибети менен Өзбекстан кәсиплик аўқамлары тәрепинен естелик белгилери менен сыйлықланды.
Илаж Қарақалпақстан көркем өнер шеберлериниң концерт бағдарламасы менен даўам етти.
Сайтымыздың телеграмдағы каналына ағза болың: https://t.me/karinformuz
