«Ел хызметинде» газетасы 15 суткаға қамалған мойнақлы блогер ҳаққында мағлыўмат берген еди. Район ҳәкимлиги мәлимлеме хызмети ўақыяға анықлық киргизди.
Хабарда жазылыўынша, райондағы «Бозатаў» АПЖ Шағырлы аўылында жасайтуғын пуқара Б.У. районлық Ишки ислер бөлими баслығына арза менен мүрәжат етип, онда 2021-жыл 26-октябрь күни саат 16:00 лер шамасында 32-санлы шаңарақлық поликлиникасында жыйналыс болып өткенлигин, жыйналыста усы аўылда жасайтуғын пуқара К.А. ҳәммениң көз алдында турпайы сөзлер ҳәм ҳәрекетлер менен шаўқым шығарғанын билдирген ҳәм оған тийисли шара көриўди сораған.
Усы жағдай бойынша районлық ИИБ ҳуқықбузарлықлар профилактикасы бөлимшеси тәрепинен сорастырыў жумыслары алып барылып, «Бозатаў» АПЖ Шағырлы аўылында жасайтуғын 1986-жылы туўылған пуқара К.А.ның ҳәрекетлеринде Ҳәкимшилик жуўапкершилик ҳаққындағы кодекстиң 183-статьясында көрсетилген ҳуқықбузарлықтың белгилери анықланған. Топланған ҳүжжетлер Жынаят ислери бойынша Мойнақ районлық судына жиберилген ҳәм суд тәрепинен пуқара К.А.ға 15 сутка ҳәкимшилик қамақ жазасы тайынланған.
Сайтымыздың телеграмдағы каналына ағза болың: https://t.me/karinformuz
