Қарақалпақстан Республикасы Жоқарғы Кеңесиниң Баслығы Мурат Камалов 25-ноябрь күни БМШ Раўажланыў бағдарламасының Өзбекстандағы ўәкилханасы баслығы Матильда Димовска, Японияның Өзбекстан Республикасындағы айрықша ҳәм толық ҳуқықлы елшиси Ёшинори Фуджияма, БМШ Халықтаныўшылық фондының Өзбекстандағы ўәкили Ю Юди қабыллады. Бул ҳаққында Жоқарғы Кеңес баспасөз хызмети хабар берди.
Ушырасыўда Жоқарғы Кеңес Баслығы М.Камалов мийманларды республикамызға сапары менен қутлықлап, елимизди социаллық-экономикалық жақтан раўажландырыў, халықтың абадан турмысын тәмийинлеў бағдарында әмелге асырылып атырған кең көлемли реформаларда, әсиресе, Арал теңизиниң қурыўы ақыбетинде келип шыққан экологиялық жағдайды жумсартыў, халықтың денсаўлығын сақлаў бойынша әмелге асырылып атырған кең көлемли жумысларға тоқталып өтип, бунда халықаралық шөлкемлер, соның ишинде, БМШ Раўажланыў бағдарламасы, БМШ Халықтаныўшылық фонды ҳәмде бир қатар раўажланған мәмлекетлердиң көрсетип атырған жәрдемин айрықша атап өтти.
Өз гезегинде мийманлар жыллы жүзлилик пенен қабыл еткени ушын Қарақалпақстан Республикасы Жоқарғы Кеңесиниң Баслығына өз миннетдаршылығын билдирип өтти. Аралбойы аймағы, соның ишинде, Қарақалпақстан Республикасын ҳәр тәреплеме раўажландырыў, социаллық-экономикалық тараўларды қоллап-қуўатлаў, экология ҳәм қоршаған орталықты қорғаў бағдарында әмелге асырылып атырған ийгиликли жумысларға буннан былай да көмеклесиў, өз-ара бирге ислесиў ҳәм биргеликдеги жойбарларды әмелге асырыў бойынша өз пикир ҳәм усынысларын билдирди.
Сайтымыздың телеграмдағы каналына ағза болың: https://t.me/karinformuz
