Усы жылдың 7-октябрь күни Бердақ атындағы Қарақалпақ мәмлекетлик университети Қарақалпақ филологиясы ҳәм журналистика факультетиниң журналистика қәнигелиги студентлери белгили журналист Есенбай Ерманов пенен ушырасты.
Ушырасыўда студентлер Есенбай Ермановтың өмири ҳәм дөретиўшилиги менен жақыннан танысып, өзлерин қызықтырған сораўларына жуўаплар алды. Сондай-ақ, 47 жыл даўамында дөретиўшилик пенен шуғылланып, 1000 нан аслам мақалалары газета ҳәм журналларда жәрияланған спорт журналисти студентлерге өзиниң тәжирийбелери менен бөлисти. Журналист «Күнделик дәптер тутың, ол ертеңги күни үлкен бир китаптың жазылыўына себеп болыўы мүмкин» деп болажақ журналистлерге өз мәсләҳәтлерин берди.
Ушырасыў соңында Есенбай Ерманов студент-жасларға өзиниң қәлемине тийисли китапларын саўға етти. Бундай ушырасыўлардың тез-тезден өткерилип турылыўы болажақ журналистлер ушын пайдалы ҳәм әҳмийетли есапланады.
Мағлыўмат ушын, Есенбай Ерманов «Еркин Қарақалпақстан», «Қарақалпақстан жаслары» газеталарында ислеген. 1994-жылы «Қарақалпақстан Республикасына мийнети сиңген журналист» атағына мүнәсип деп табылған. Оның авторлығында «Жумабай жыраў Базаров», «Ақыл көзи менен қара», «Халқы кәдирлеген азамат», «Парыз», «Дәўлет қусы» гүрриңлер топламлары баспадан шыққан.
Шахноза-Бану Абдуллаева,
ⱩМУ қарақалпақ филологиясы ҳәм журналистика факультетиниң 2-курс студенти
Фотолар авторы: Қабулбек Бегимов
Karinform.uz
