Усы жылдың 19-20-декабрь күнлери Ташкент қалалық «Истиқболли авлод» социаллық-информациялық орайы тәрепинен «Адам саўдасына қарсы гүресиў: реинтеграция бойынша нәтийжели әмелият» атамасындағы жуўмақлаўшы конференция өткерилип атырғанлығы туўралы өткен мақалаларымызда хабар берген едик. Бул конференцияда адам саўдасына қарсы гүресиў, оның алдын алыў, бул туўралы халыққа кең түрде информация жеткерип бериў, адам саўдасы қурбанларын елине қайтып келгеннен соң оның жәмийетке араласыўына жәрдем бериў ҳәм бул теманы ғалаба хабар қуралларында дурыс сәўлелендириў туўралы мәселелер қаралмақта.
Адам саўдасы тек ғана бир адам ямаса бир топар, шөлкемге ғана тийисли машқала емес. Ол пүткил жәмийетке, ондағы барлық пуқараларға тийисли. Буны усы шөлкемниң волонтёрлары усы конференция даўамында әжайып бир көринис сыпатында көрсетип берди. Яғный, адам саўдасына қарсы гүресиў, оннан жәбирленгенлерди жәмийетке қайтарыў ушын үлес қосып атырған шөлкемлер ҳәм адамлар ушын зал ортасында турған гүзеге гүллер салынды. Буның терең мағанасы бар. Бир машқаланы шешиў ушын пүткил жәмийет ҳәрекет етиўи кереклиги усындай сулыў ҳәрекетлер менен көрсетилди.
Сондай-ақ, адам саўдасының қурбаны болған адамды жәмийет қабылламай атырғанлығы, бирақ, оны шөлкемлер қоллап-қуўатлап атырғанлығын сәўлелендириўши кишкене, бирақ, мәниси терең сахналық көринислер қойып берилди. Буларды төмендеги сүўретлер арқалы да көриўиңиз мүмкин.
Сахибжамал Есемуратова
