Мәкеме, көше, дүканлардың ҳәм тағы басқа халыққа хызмет көрсетиў орынларында жазылған сөзлерде қәтелер баршылық. Мақаланы алысқа кетпей өзим жасайтуғын көшемизден басламақшыман. Бизлер пайтахтымыздағы Ислам Кәримов гүзарында жайласқан Атағулла Худайбергенов атындағы көшеде жасаймыз. Оның аты 2017-жылы «Мийўалы», бәлки «Мийўели» деп өзгертилди. Соң көшемиздиң басына көшениң аты жазылған тахтайшалар илдирилди. Турғынларға да көшениң аты менен жай номери жазылған тахтайшалар сатылды. Көшемиз Ислам Кәримов гүзарынан өткенлердиң бәрине көринеди. Бирақ, бир ашынарлы жағдай көшениң атында анықлық жоқ. Көшемиздиң оң тәрепиндеги үйлерге «Мийўалы» ал, шеп тәрепиндеги үйлерге «Мийўели» деп жазылған. Усы тахтайшада жазылған еки түрли жазыў көшемиздиң сәнин бузып тур, адамлардың қол менен көрсетип күлип кетиўине себеп болмақта.
Басқа машқалалардың қасында бул кишкене бир машқаладай көринер. Бирақ, нәрестеге ат қойып атырғанда, сениң атың «Мийўагүл» ямаса «Мийўегүл», екеўин де айтып жүребер деп, паспортқа еки түрли атын жазбайды-ғо. Қәте болсын, дурыс болсын, адамға да, буйымларға да тек бир ат бериледи. Усы көше турғынлары да көшемизге берилген атқа анықлық киргизилиўин қәлейди.
Шахзада Алимбетова
