Марк Цукерберг АҚШ президенти болыўды режелестирген бе?

2017-жылдың басынан Facebook директоры Марк Цукерберг АҚШ штатлары бойлап саяхат қылмақта. Ол жергиликли халық пенен сәўбетлесип, сондай-ақ, өзиниң социаллық тармағындағы аудитория менен жақыннан танысып атыр. Цукерберг өзиниң күтилмеген саяхатынан мақсети тек танысыў екенлигин айтып өткен болса да, бул ҳәрекети оның сиясий карьерасын баслаўға ҳәрекет етип атыр деген пикирди келтирип шығарады.
Марк Цукерберг ҳәр жылы өзиниң алдына үлкен мақсетлер қояды:
2013-жылы ол ҳәр күни жаңа инсанлар менен танысыўға ҳәрекет етти.
2014-жылы ҳәр күни миннетдаршылық хатын жазды.
2015-жылы жеке китапханасын ашып, бир жылда 23 китап оқып шықты.
2016-жылы 590 километр аралыққа жуўырды.
2017-жылы болса жылдың ақырына шекем Американың барлық штатларын айланып шығыўды режелестирген.
Соңғы жыллары Цукерберг турақлы түрде ҳәр түрли еллердиң басшылары менен ушырасты. 2011-жылы АҚШ тың сол ўақыттағы президенти Барак Обама менен, 2012-жылы Москваға барып, Бас Министр Дмитрий Медведьев пенен, 2014-жылы Ҳиндистан Бас Министри менен, 2015-жылы Бразилия Президенти менен, 2016-жылы Ватикан мәмлекетиниң басшысы менен ушырасып сәўбетлести. Сондай-ақ, жақында Facebook директоры Гарвард университетиниң дипломын алыўға миясар болды.

Бул ҳәрекетлердиң барлығы президентликке таярлық ҳәрекети сыпатында көринбекте. АҚШ тың нызамына муўапық, президент кеминде 35 жаста болыўы керек. 2020-жылдың ноябринде яғный, жаңа президент сайлаўына старт беригенинде Цукерберг 36 жасқа толады.

Дәрек: xabardor.uz