Жаслардың сүйенишине айланған «Камолот» жаслар жәмийетлик ҳәрекети Бердақ атындағы ҚМУ басланғыш шөлкеминиң басламасы менен 15-апрель күни университеттиң мәлимлеме-ресурс орайында «Камолот» китапханасы» шөлкемлестирилди ҳәм оның ашылыў салтанаты өткерилди. Онда университеттиң руўхыйлық ҳәм ағартыўшылық ислери бойынша проректоры Х.Турсунбоев ҳәм профессор-оқытыўшылар, белсенди студент-жаслар сөзге шығып, жаратылып атырған усындай мүмкиншиликлерден нәтийжели пайдаланыў кереклиги, бул китапхананың жасларды ағартыўшылық идеяларына қарай бағдарлаўда хызмети үлкен болатуғыны ҳаққында айтып өтти.
Китапханаға Ташкент қаласында «Камолот кутубхонаси» рубрикасы астында жарық көрген 200 ге шамалас атамадағы дүнья ҳәм өзбек әдебиятының белгили шығармаларын алып келинди.
Китапханада әдебий китаплар менен бирге илимниң ҳәр қыйлы бағдарлары бойынша жазылған дөретпелерди де ушыратыў мүмкин. Салтанатлы илаж қатнасыўшылардың китаплар менен танысыўы ҳәм өз-ара пикирлесиўи менен даўам етти.
Мың айтқаннан, бир мәрте көрген абзал. Ҳәммеңизди университет «Камолот» китапханасына» шақырып қаламыз.
Ислам МАТЕКОВ. 
