Хабарыңыз бар, усы жылдың 18-июнь күни Ташкент қаласында, ал 20-июнь күни Өзбекистан Республикасының барлық аймақларында, соның ишинде Қарақалпақстан Республикасында да улыўмалық орта билимлендириў системасындағы өзгерислер – 9 жыллық билимлендириўди 11 жыллыққа өзгертиў бойынша оқыўшылар ҳәм ата-аналар арасында сораўнама өткерилди. Сораўнаманың жуўмақлары бойынша Халық билимлендириў министрлигиниң рәсмий веб-сайтында хабар берилмеди. Ташкент қаласындағы өткерилген сораўнаманың жуўмақлары бойынша Kun.uz басылымында мағлыўмат жәрияланды. Мағлыўматқа қарағанда, ата-аналардың 70%и мектеплерде 10- ҳәм 11-класслардың ашылыўын, перзентлериниң лицей ямаса кәсип-өнер колледжлерине қарағанда, мектепте оқыўын даўам еттириўиниң тәрептары болған.
Интернет басылымларында бул мәселе бойынша түрли пикир-таласлар жүзеге келди. Мәселен, Kun.uzда жәрияланған «Акс-садо: «Коллежларда ўқиган авлод йўқотилди», дейиш кўр-кўрона ҳукм қилишдир» атамасындағы мақалада жазылыўынша, 11 жыллық мектеп билимлендириўине усы жылдың өзинде өтиў оптимал вариант емес. Мақала авторы буның ушын кесент етип турған бирнеше себепти келтирип өткен. Булар:
- Еле ислеп шығылмаған сабақлар ҳәм сабақ өтиў бағдарламасы;
- Оқыўлық қолланбалар ҳәм сабақлықлардың жоқ екенлиги;
- Жеткиликли дәрежедеги көп қаржы сарпланыўы;
- 11-класстан соң оқыўшылардың не менен бәнт болыўы ҳаққында анық пикирдиң жоқ екенлиги.
Автор мақала соңында 11 жыллық мектеп билимлендириўине өтиў ушын кеминде 3 жыл даўамында анық ҳәм пуқта ислеп шығылған бағдарлама тийкарында алып барыў мақсетке муўапық болады, деген пикирди билдирип өткен.
Ислам Матеков.
