Жақын аралықта әмелге асырыў мүмкин болған қәўиплердиң ең тийкарғысы – шегаралар бойынша орналастырылған Арқа Корея артиллериясы есапланады. Ол Қубла Кореяның үлкен аймақларына соққы бере алыўы мүмкин: бундай жағдайда ең көп зыян көретуғын аймақ – шегарадан 15 км қашықлықта жайласқан қалалар болады. Бирақ, Stratforдың мағлыўматларына қарағанда, мәмлекет пайтахты Сеуль да оғада аўыр артиллерия соққыларына дуўшар болыўы мүмкин.
Кейинги графиктен көринип турғанындай, ҳәзирги жетекшиси ўақтында Арқа Корея оның әкеси ҳәм атасы басшылық еткен дәўирлерден де көбирек баллистикалық рекаталарды ушырған.
Bloombergтиң атап өтиўине қарағанда, Ким Жонг-Ун 2011-жылы ҳәкимият басына келгеннен соң, мәмлекеттиң ядролық бағдарламасының раўажланыўын жеделлестирген ҳәм ҳәзирде мәмлекет Қубла Корея және Японияға 20 атом бомбасын таслаў қүдиретине ийе. Ендилигинде режим узақ радиуслы ракеталар жаратыў бойынша жумыс алып бармақта, мақсети – ядролық қуралды Америка Қурама Штатларының пайтахтына шекем жеткере алатуғын ракета жаратыў. Бул график КХДР ракета арсеналы ҳаққында бизге белгили болған барлық мағлыўматларды улыўмаластырады.
Кейинги иллюстрацияда Арқа Кореяның баллистикалық системасы ушын максимал есаплық диапазон сүўретленген. Тэподонг-2 ҳәм KN-14 сыяқлы «ең заманагөй» ракеталардың жеткерилиў радиусы бойынша пикирлер ҳәр қыйлы болса да, олар АҚШ аймағының үлкен бөлегине қәўип сала алады, деп болжанбақта.
Айырым аналитиклердиң пикиринше, Тэподонг-2 тек ғана орбитаға жасалма жолдас шығарыў ушын пайдаланыўға жарамлы, ядролық қуралларды жеткерип бериўде оның хызметинен пайдаланыўдың илажы жоқ.
Батыс еллерин Тэподонг-2 ден де бетер қорқынышқа салып турғаны KN-08 баллистикалық ракетасы есапланады. 11,5 мың пәрўаз радиусына ийе болған бул ракета АҚШтың үлкен қалаларына да қәўип сала алады.
Жылдың басында Ким Жонг-Ун ракета сынақларының «соңғы басқышында» екенлигин айтып өткен, буған жуўап ретинде Дональд Трамп Твиттерде «Бундай жағдай жүз бермейди!» деп жазған еди.
Сондай-ақ, дем алыс күнлери КХДРда қуяш күнлери мүнәсибети менен болып өткен әскерий парадларда континентлер аралық жаңа баллистикалық ракетаны таныстырған. Қубла Корея армиясының мағлыўматларына қарағанда, ол бүгинги күнде бар болған KN-08 ямаса KN-14 ракеталарына салыстырғанда узын, яғный ол егер де шыны менен де ислеп шығылған болса, режимниң ең узаққа ушыра алатуғын қуралы болады.
Арқа Корея ядролық қуралларының АҚШтың Тыныш океаны жағалаўларына суў асты кемелеринде жеткерилиўи тағы бир потенциаллық қәўип болып табылады. Суў асты кемелери дизель жанар майында ислейди ҳәм оларды портты тәрк еткен ўақытта анықлаў ҳәм жоқ етиў аңсат, - әлбетте, буны АҚШтағылар да жақсы биледи, бирақ, олар тийисли аралыққа жақынласып алса, Вашингтонды да биймәлел нышанға алыўы мүмкин.
Дәрек: Kun.uz
