Президент маслаҳатчиси Қаҳрамон Қуранбаев қорақалпоғистонлик ўқувчилар, уларнинг ота-оналари ва мактаб директорларига ташаккурнома йўллади

Ўзбекистон Республикаси Президентининг давлат маслаҳатчиси, Олий Мажлис Сенати аъзоси ва Ўзбекистон ёшлар иттифоқи Марказий Кенгаши раиси Қаҳрамон Қуранбаев Қорақалпоғистон Республикасидаги мактабларда намунали хулқи ва ўқишда аъло баҳоларга ўқиб келаётган бирнечта ўқувчиларга, уларнинг ота-оналарига ҳамда мактаб директорларига ташаккурнома йўллади.




Шу йилнинг 5-6 апрель кунлари Ўзбекистон ёшлар иттифоқи Нукус шаҳар Кенгаши «Камалак» болалар ташкилоти раиси Азамат Абибуллаев пойтахтимиздаги 18-, 19-, 25- ва 27-сонли умумтаълим мактаблари ўқувчилари, уларнинг ота-оналари ва мактаб директорларига Президент маслаҳатчиси йўллаган ташаккурномаларни тантанали равишда топширди.




Шунингдек, ўқишда аъло натижаларга эриша олмаётган ўқувчиларга ишонч ёрлиқлари ҳам топширилди. Унда «Биласанми, сенда ҳали ҳеч ким илғамаётган ташаббускорлик, эртанги кунга ишонч бор. Ўзингдаги ана шу куч-ғайратни яхши ишларга сарфла!... Устозларинг, ота-онанг, оила аъзоларинг, дўстларинг ва Ўзбекистон ёшлар иттифоқи Сенга ишонади» деб ёзилган.






- Келажак эгалари бўлмиш ўқувчиларга бундай даражадаги эътибор фақат бизнинг мамлакатимизда бор. Ушбу ҳаракатларимиз ўқувчиларнинг дунёга донғи кетган ота-боболаримизнинг муносиб давомчилари бўлиб етишичига, ёрқин келажагига замин яратади, уларни доимо изланишда ва ҳаракатда бўлишга чорлайди, - дейди Ўзбекистон ёшлар иттифоқи Нукус шаҳар Кенгаши «Камалак» болалар ташкилоти раиси Азамат Абибуллаев.

Сайтимизнинг телеграмдаги каналига аъзо бўлинг: https://t.me/karinformuz

Ислам Матеков.