ҚМУда өрт қәўипсизлиги ҳәптелиги өткерилмекте

Бердақ атындағы Қарақалпақ мәмлекетлик университетинде усы жылдыӊ 16-апрель сәнесинен 21-апрель сәнеси аралығында студент жасларға «Өрт қәўипсизлиги тийкарлары» арнаўлы курсы өткерилмекте.
Арнаўлы курсты университеттиӊ Тәбияттаныў факультети Экология ҳәм топырақтаныў кафедрасы профессор-оқытыўшылары ҳәм Қарақалпақстан Республикасы Өрт қәўипсизлиги басқармасы хызметкерлери менен биргеликте шөлкемлестирген. Университеттиӊ барлық факультетлериндеги студентлерге өрт қәўипсизлиги бойынша түсиндириў жумыслары үлкен аудиторияларда ҳәм мәденият сарайында өткерилмекте. Соӊ ашық майданда өрт өшириў ушын арналған әсбап-үскенелерди ҳәм олардыӊ атқаратуғын ўазыйпасы туўралы мағлыўматлар берип, әмелиятта ислеп көрсетпекте.

«Бундай илажлардыӊ өткерилиўи студентлерге өрт қәўипсизлиги жүз бергенде қандай илажларды қолланыў кереклиги бойынша түсиник береди. Бизиӊ факультетимиздиӊ студентлерине өрт қәўипсизлиги бойынша сабақ өтиледи. Бул илаж болса, сол сабақтыӊ әмелий көриниси болды деп айта аламыз», - деди Тәбияттаныў факультетиниӊ оқытыўшысы б.и.к. Тәӊирберген Жүгинисов.