Мағлыўматларға қарағанда, бүгинги күнде Россия Федерациясында 25 000 ға жақын Өзбекстан жаслары билим алмақта. Еки мәмлекет жасларының мобиллигин раўажландырыў, оларға билим алыўы ушын мүнәсип шараят жаратыў бойынша Өзбекстан Республикасы Министрлер Кабинети жанындағы Билимлендириў сапасын қадағалаў мәмлекетлик инспекциясы баслығы У.Ташкенбаев басшылығындағы делегация Россия Федерациясының Илим ҳәм билимлендириўди қадағалаў федерал хызмети менен сөйлесиўлер алып барды. Бул ҳаққында Министрлер Кабинети жанындағы Билимлендириў сапасын қадағалаў мәмлекетлик инспекциясының баспасөз хызмети хабар берди, деп жазады xabar.uz.
Мәмлекетлик инспекциясы делегациясы Илим ҳәм билимлендириў тараўын қадағалаў федерал хызмети ҳәм Россия Федарациясы Илим ҳәм билимлендириў министрлигиниң қәнигелери менен биргеликте «Россия Федерациясы ҳүкимети ҳәм Өзбекстан Республикасы Министрлер Кабинети ортасында билимлендириў ҳүжжетлерин, қәнигелик ҳәм илимий дәрежелерин өз-ара тән алыў бойынша ҳүкиметлер аралық Питим» жойбарын ислеп шықты.
Усы ҳүжжетлердиң тастыйықланыўы еки мәмлекет ортасында билимлендириў ҳүжжетлериниң туўрыдан-туўры тән алыныўы, жаслардың билим алыўындағы бюрократиялық тосықларды сапластырыўды тәмийинлейди.
Мағлыўмат ушын, Россияда хүжжетлерди нострификациялаў 45 күнге шекем ўақытты алады.
Сахибжамал Есемуратова
