Гәп бактериялар ҳаққында болғанда, көбинесе оның инсан организмине зыяны ҳаққында айтылады. Бирақ, олардың арасында инсан организми ушын пайдалы түрлери де бар екен.
Мичиган университетиниң изертлеўшилери инсан организми менен мурын ҳәм тамақтағы бактериялардың симбиотикалық байланысы бар екенлигин анықлады, деп хабар берди vesti.ru. Анықланыўынша, олардың айырымлары грипп вирусы менен гүресиўге жәрдем береди екен.
Бактерия ҳәм вируслар бир-биринен өзгеше, бөлек «түсиник», инсанды бактериядан қутқарыўшы дәрилер, оны вируслардан қутқармайды.
Илимпазлар изертлеўлер ушын 2012-2014-жыллардағы материаллардан пайдаланған. Орайлық Америкадағы түрли қалалардан 144 үйде жасаўшы 717 инсанның мағлыўматлары менен танысып шыққан. Изертлеўшилер грипп вирусының шаңарақ ағзаларына тарқалыўы менен қызықсынған. Нәтийжелерге муўапық, мурын ҳәм тамақтағы айырым бактериялар грипп вирусына қарсы гүресиўге жәрдем беретуғынлығы анықланған.
Сахибжамал Есемуратова
