Музейлерге саяхат, спорт жарыслары: ҚМУда студентлердиң бос ўақты мазмунлы өтпекте

2019-жылдың 28-30-январь күнлери аралығында студентлердиң бос ўақтын, мәдений дем алысын мазмунлы өткериў, руўхый-ағартыўшылық жумысларын ғалабалық түрде шөлкемлестириў, спорт пенен шуғылланыўды үгит-нәсиятлаў мақсетинде Бердақ атындағы Қарақалпақ мәмлекетлик университетиниң Қарақалпақ филологиясы факультетинде бир қатар илажлар әмелге асырылмақта.
Факультет тәрепинен ислеп шығылған ис-режеге муўапық, 29-январь күни факультеттиң 1-курсында билим алып атырған жәми 128 студентке Өзбекстан Республикасы Президенти Ш.Мирзиеёвтың Олий Мажилиске мүрәжатнамасының мазмун-мәниси түсиндирилди, сондай-ақ, китапқумарлық мәденияты ҳаққында түсиник берилди.



Күнниң екинши ярымында университеттиң Мәденият сарайында айырым топар студентлерине «Үш бойдақ» спектакли, басқа топарларға болса «Ҳаёт» көркем фильми, Бердақ атындағы академиялық музыкалық театрында «Лувр үйреги» спектакли студентлердиң итибарына усынылады. Буннан соң Бердақ миллий музейине, А.Шамуратованың үй музейине, Үлкетаныў музейлерине барып, студентлер ол жердеги экспонатлар менен жақыннан танысады. Күн ақырында студентлер спорттың волейбол ҳәм киши футбол түрлери бойынша факультетлер аралық жарысына қатнасыўы режелестирилген.

Сахибжамал Есемуратова