Жергиликли газеталардың бас редакторы лаўазымындағы ҳаял-қызлар

ЗУЛЕЙХА НУРМЕТОВА – Қарақалпақстан Республикасына хызмет көрсеткен журналист, «Давр кўзгуси» газетасының редакторы.



1991-жылдан Өзбекстан Журналистлер дөретиўшилик аўқамының, 2006-жылдан Өзбекстан ҳәм Қарақалпақстан Жазыўшылар аўқамының ағзасы. 1998-жылы «Қарақалпақстанға хызмет көрсеткен журналист» атағы, 2018-жылы «Дослық» ордени менен сыйлықланды. «Элликқала тароналари», «Истиқлол илҳомлари» қосықлар топламының авторы.

ГҮЛНАРА ДӘЎЛЕТМУРАТОВА – «Тахтакөпир таңы» газетасының редакторы.



1989-жылы «Тахтакөпир таңы» газетасында жумыс баслады. 2004-жылдан газетаның редакторы лаўазымында ислеп келмекте. 1999-жылдан Қарақалпақстан телеканалының районлық хабаршысы болып ислеп келмекте. «Өзбекстан Республикасы ғәрезсизлигиниң 15 жыллығы» ҳәм «Өзбекстан Республикасы ғәрезсизлигиниң 25 жыллығы» көкирек нышанлары менен сыйлықланды. 2015-жылы «Үлкенге ҳүрмет» китабы баспадан шықты. 2017-жылы Өзбекстан баспасөз ҳәм хабар агентлигиниң ҳүрмет жарлығы, 2018-жылы «Шуҳрат» медалы менен сыйлықланды.

ТИЛЕЎХАН ШӘМЕКОВА – «Тахиатас хабарлары» газетасының редакторы.



Мийнет жолын 1991-жылы Қарақалпақстан радиоканалынан баслады. 2000-жылдан Қарақалпақстан телеканалында ислеп келмекте, 2006-жылдан Тахиатас районының хабаршысы. «Ассалаўма әлейкум, Қарақалпақстан» көрсетиўиниң дәслепки баслаўшыларының бири. 2014-жылдан «Нурлы жол» газетасының Қарақалпақстан Республикасы ҳәм Хорезм ўәлаяты бойынша арнаўлы хабаршысы. 2014-жылы Қарақалпақстан телеканалының «Жылдың ең белсенди хабаршысы» номинациясы менен сыйлықланды. 2017-жылдан «Тахиатас хабарлары» газетасының редакторы болып ислеп келмекте.

ГҮЛИСТАН ҚАРАЖАНОВА – «Қоңырат ҳақыйқаты» газетасының редакторы.



1999-2006-жыллары Қарақалпақстан телеканалында редактор, 2006-2013-жыллары «Жәмийетлик-сиясий ҳәм социал-экономикалық бағдарламалары бас редакциясы»нда Қоңырат қаласы бойынша хабаршысы болып иследи. Ҳәзирде «Қоңырат ҳақыйқаты» газетасының редакторы.

ГҮЛЖӘҲӘН ТӘЖЕТДИНОВА – «Устаз жолы» газетасының бас редакторы.



Мийнет жолын 1999-жылы «Қарақалпақстан» баспасында редактор болыўдан баслады. 2004-жылы «Қарақалпақфильм» киностудиясында бас редактор болып иследи. 2006-жылдан «Устаз жолы» газетасында ислеп келмекте. 2011-жылы «Кеўил жийегимде атқан таң», 2015-жылы «Әдираспан моншақлары» китаплары жарық көрди. Жигирмадан аслам ҳүжжетли фильмлердиң авторы. «Саламат бала жылының ҒХҚда сәўлелендирилиўи» таңлаўының 1-орын, 2009-жылы «Ең уллы, ең әзиз» таңлаўынының Қарақалпақстан Республикалық басқышы, 2015-жылы «Аталар сөзи – ақылдың көзи» таңлаўында 2-орын, 2018-жылы «Жылдың ең белсенди журналисти» таңлаўының жеңимпазы болды.

ГҮЛМИРА ПАЛЎАНОВА – «Қарақалпақстан мәденияты» газетасының редакторы.



2011-2014-жыллары Қарақалпақстан радиоканалында, 2014-2016-жылларда «Мәденият ҳәм спорт» газетасында иследи. 2017-жылдың 5-апрелинен баслап «Қарақалпақстан мәденияты» газетасының бас редакторы лаўазымында ислеп келмекте. 2013-жылы «Ижтимоий корхона, ижтимоий жамият, ижтимоий хизматлар» таңлаўында радио жөнелиси бойынша, 2016-жылы «Қамсызландырыў журналистлер нәзеринде» таңлаўында, «Ең уллы, ең әзиз» таңлаўда хошаметленди. 2017-жылы «Жәмийет ҳәм мен» таңлаўында «Өз заманының қаҳарманларын сәўлелендирген журналистлик материал» бағдары бойынша 1-орын ийеси болды. 2015-жылы жазыўшы А.Әбдиев пенен биргеликте «Талантлы жаслар» китабы баспадан шықты.

Сахибжамал Есемуратова