Жерлеслеримиз Халықаралық бақсышылық фестивалында жеңимпаз болды

Сурхандәрья ўәлаятының Термиз қаласында өткерилип атырған Халықаралық бақсышылық өнери фестивалы шеңберинде республикалық бақсылардың таңлаўы болип өтти. Бул ҳаққында ҚР Министрлер Кеңеси мәлимлеме хызмети хабар берди.
Онда Өзбекстан Республикасының ҳәр қыйлы аймақларында дөретиўшилик етип атырған 87 бақсы, ақын ҳәм жыраўлар қатарында қарақалпақстанлы көркем өнер хызметкерлери де белсене қатнаспақта.
3 бағдар бойынша шөлкемлестирилген таңлаў қатнасыўшыларының ҳәр бир шығыўларын тәжирийбели төрешилер қурамы ашық-айдынлық ҳәм қалыслық принциплери тийкарында баҳалап барды.
Таңлаў жуўмағында ашық ҳаўазда дәстан жырлаў бойынша жерлесимиз Ерисбай бақсы Асқаров сыйлы 1-орынды, ал Муҳаммед бақсы Төребеков 3-орынларды қолға киргизип, дипломлар ҳәм сәйкес түрде 5 миллион сум ҳәм 3 миллион сум муғдарындағы ақшалай сыйлықлар менен сыйлықланды.
Жыраўлар бағдарында Саламат жыраў Аяпов 2-орынды қолға киргизди ҳәм 4 милион сум муғдарындағы пул сыйлығы менен сыйлықланды.
Сондай-ақ, фестивальға белсене қатнасқаны ушын жерлеслеримиз М.Аекеев, М.Муҳаммеддинова ҳәм Б.Асқаровалар диплом ҳәм пул сыйлықлары менен сыйлықланды.
Халықаралық фестиваль қызғын даўам етпекте.

Сайтымыздың телеграмдағы каналына ағза болың: https://t.me/karinformuz