Спорт – беккем шаңарақ таянышы

Әжинияз атындағы Нөкис мәмлекетлик педагогикалық институтында ислеп атырған профессор-оқытыўшылар, техник хызметкерлер ҳәм олардың шаңарақ ағзалары қатнасыўында «Спорт – беккем шаңарақ таянышы» атамасындағы шаңарақлық спорт жарысы өткерилди.
Институт факультетлеринен бир командадан қатнасқан спорт жарысында қатнасыўшылар жуўырыў, акробатикалық элементлер ҳәм топты нышанаға тийгизиў, шаққанлық ҳәм мергенлик, топты дәрўазаға жоллаў, «Аңшы ҳәм қоян ойыны», сондай-ақ, тезлик, епшиллик эстафеталары, арқан тартысыў бойынша өзлериниң спорт шеберликлерин сынап көрди.



Шаңарақ ағзаларын, әсиресе, өсип киятырған жас әўладты кең түрде спортқа тартыў, олар арасында саламат турмыс тәризин енгизиў ҳәм бос ўақытларын мазмунлы өткериў мақсетинде шөлкемлестирилген жарыста жеңимпазлар анықланып, институт кәсиплик аўқамы ҳәм спорт клубы тәрепинен сыйлықланды.
Жеңимпаз команда жарыстың келеси басқышына жолламаны қолға киргизди.

Ислам Матеков.

Сайтымыздың телеграмдағы каналына ағза болың: https://t.me/karinformuz