НМПИдиң мектепке шекемги ҳәм баслаўыш тәлим факультетинде қазақстанлы профессор сабақ өтти

Әжинияз атындағы Нөкис мәмлекетлик педагогикалық институты мектепке шекемги ҳәм баслаўыш тәлим факультетинде Қазақстан Республикасы Яссаўий атындағы Халықаралық қазақ-түрк университети ҳәм Қубла Қазақстан мәмлекетлик педагогикалық институтының профессоры, педагогика илимлериниң докторы Гульфайруз Еркибаева студентлерге сабақ өтти.
Мектепке шекемги ҳәм баслаўыш билимлендириўде жаңа педагогикалық технологиялар ҳәм изертлеў усылларын қолланыў, оларда әмелий нәтийжелиликти арттырыў мәселелери бойынша өз тәжирийбелери менен бөлисти.

Гульфайруз Еркибаева Қазақстан Республикасында 2009- ҳәм 2010-жыллары жоқары оқыў орнының ең жақсы оқытыўшысы деп табылған. Усы күнге шекем педагогика бағдарында 550 ге шамалас илимий мийнетлерге авторлық еткен. Атап айтқанда, Германияда 4, Польшада 1, Чехияда 1, Россияда 3, Қазақстанда 8 монографиясы баспадан шығарылған.
Ҳәзирги ўақытта Абай атындағы Қазақстан Миллий педагогикалық университети жанындағы диссертациялар бойынша кеңестиң турақлы ағзасы есапланады.
Институтта қазақстанлы профессор институт оқытыўшылары қатнасыўында семинар-тренинг де шөлкемлестирилип, алдағы ўақытлары кадрлар таярлаў мәселелери бойынша келисимге ерисилди.