Нөкис бул бәрше жаслар ушын орай! Мине, мениӊде бул қалада жүргениме дерлик бир ай болыпты. Студентлик бахты өзгешелигин әсте-ақырын билип атырман. Лекин, бул алтын дәўирдиӊ басты қатыратуғун жери жөнелисли такси екенлигин енди билип атырман. Ҳәзирги ўақытта «Теле-орай, жуўазшы» елатында жасайман. Бул мәнзилге авто вокзалдан 92 ал, базардағы авто көликлер турар орнынан 53-жөнелисли таксилер қатнайтуғынлығы белгили. Студент болғанлығым себепли, азанда университетке 08:30 да жетип барыўым керек. Сонлықтан, 08:00 де үйден шығаман. Тилекке қарсы, 92-жөнелисли таксиге азанда өткен бир ай даўамында тек ғана еки мәрте мине алдым. Көбинесе, университетке қарай жүретуғын жол-жөнекей авто көликлерге минип мәнзилиме жетип аламан. 12:50 де үшинши сабақтан соң бәндиргиге карай жол аламыз. 13:20 дан баслап мен жөнелисли такси күтиўши жолаўшыға айланаман. Өткен бир ай даўамында үйге 14:00 ден бурын келип көрмедим. Себеби, 92-жөнелисли таксилердиң аз ямаса оған миниўши жолаўшылардың саны көп. Бул машқала тек мендей студентлер емес, ал, таза жол мәнзили турғынларының машқаласы. Қулласы, ҳәр күнимниң 40 минуты жөнелисли таксилерди күтиўге сарпланады. Есаплап қарасам, күнине 1 саат 20 минут күткен ўакытларым да болған.
Ўақыт бийбаҳа байлық! Әлбетте, оны босқа жибермеўимиз керек. Бирақ, биз өзимиз билмеген ҳалда ўақтымызды қолдан жиберип атырмыз! Мениң қымбатлы ўақтымды урлап атырған 92-жөнелисли такси қайдасаӊ өзи?
Пердебаева Шахноза
Журналистика қәнигелигиниң 1-курс студенти
