Қарақалпақстанға өткен дәўир ишинде қанша турист келди?

Бүгинги күнде республикамызда улыўма 37 туристлик шөлкем хызмет көрсетпекте. Солардан 22 мийманхана, 5 қараүйлер комплекси ҳәм 10 туристлик фирмалар елимиз ҳәм шет елли мийманларға өз хызметлерин усынбақта. Бул ҳаққында ӨзР Туризмди раўажландырыў бойынша мәмлекетлик комитети ҚР басқармасы баслығының ўазыйпасын атқарыўшы Б.Қусекеев «Устаз жолы» газетасында жәриялады.
Мағлыўматта жазылыўынша, усы жылдың үшинши шерегиниң жуўмақларына муўапық, өткен дәўир ишинде мийманханаларда 6351 туристке хызмет көрсетилген. Олардың елимизде жасаў күнлери орташа 9510 күнди қураған. Бул көрсеткишти өткен жылдың усы дәўирине салыстырсақ, туристлер саны 30% ке, олардың орташа жасаў мүддети 23% ке өскенлигин көремиз. Өткен жылы бул көрсеткиш бойынша мийманханаларда 4852 туристке хызмет көрсетилген болып, олардың орташа жасаў дәўири 7599 күнди қураған еди.

Ислам Матеков.