Әмиўдәрья районлық ҳәкимшилик суды тәрепинен Өзбекстан Республикасы Ҳәкимшилик жуўапкершилик ҳаққындағы кодекстиң 1842-статьясында көрсетилген ҳуқықбузарлықларды әмелге асырған бир топар пуқараларға нызам шеңберинде жаза тайынланды.
Атап айтқанда, усы районның «Қыпшақ» АПЖ турғыны, 1993-жылы туўылған пуқара Ш.М. Қазақстан Республикасының Ақтаў қаласында жумыс ислеп жүргенде, социаллық тармақлар арқалы қол телефонына қадаған етилген диний мазмундағы материалларды жыйнаған ҳәм оларды Өзбекстан Республикасына алып келген.
Сондай-ақ, усы аймақ турғыны, 1988-жылы туўылған Е.Ш. «Одноклассники» тармағында профиль ашып, қадаған етилген диний мазмундағы видео ҳәм баянатларды тарқатып келген.
Маңғыт қаласы турғыны, 1996-жылы туўылған пуқара Х.Р. болса социаллық тармақтағы топарда қадаған етилген диний мазмундағы видеоны тарқатып, ҳуқықбузарлыққа қол урған.
Районлық Ишки ислер бөлими тәрепинен топланған айғақлы дәлиллер, сондай-ақ, айыпланыўшылардың өз айыбын тән алғанын есапқа алып, Әмиўдәрья районлық ҳәкимшилик суды тәрепинен Өзбекстан Республикасы Ҳәкимшилик жуўапкершилик ҳаққындағы кодекстиң тийисли статьялары менен жоқарыда атап өтилген пуқаралар тийисли жуўапкершиликке тартылды.
Ислам Матеков.
Сайтымыздың телеграмдағы каналына ағза болың: https://t.me/karinformuz
