ҚМУ студенти «Жаслар аўқамы стипендиясы» жеңимпазы болды

Жоқары оқыў орынларының бакалавр басқышы студентлери арасында өткерилген «Өзбекистан жаслар аўқамы стипендиясы»ның 2017-2018-оқыў жылы бойынша республикалық басқыштың жеңимпазлары анықланды.
Таңлаў жуўмақларына муўапық, Қарақалпақстан Республикасы бойынша Бердақ атындағы Қарақалпақ мәмлекетлик университетиниң қарақалпақ филологиясы факультетиниң 2-курс студенти Наргиза Балтабаева жеңимпаз деп табылды.
Наргиза Балтабаева өзиниң қарақалпақ халқының бай мийраслары, соның ишинде, фольклорымызды жаслар арасында кең үгит-нәсиятлаў, халық аўзындағы әдебий мийрасларымызды топлаў ушын хызмет ететуғын ҳәм усы мақсет жолында жасларды бирлестиретуғын жойбары менен Өзбекистан көлеминде жеңимпазлар қатарынан орын алды.
Мағлыўмат ушын, «Өзбекистан жаслар аўқамы стипендиясы»ның финаллық басқышына Бердақ атындағы Қарақалпақ мәмлекетлик университетинен 5 студент өз жойбарлары менен қатнасқан еди.

Сахибжамал Есемуратова.