Karinform.uz сайты Қарақалпақстан Республикасына хызмет көрсеткен артист, «Ардақлаў-2016», «Ардақлаў-2017» сыйлығының лауреаты Гүлнара Мунтеева менен оның балалық демлери туўралы сәўбет шөлкемлестирди.
Гүлнара Мунтеева балалығын еслеп, көшесиндеги өткерилетуғын жарыслар туўралы айтып берди:
«Балалығымызда көшемиздиң қызлары тез-тезден қосық айтыў, аяқ ойын бойынша жарыслар, концерт шөлкемлестиретуғын еди. Усы концертке қолдан түр қәлемлер менен билет ислеп, көшемиздиң турғынларына 5 тийинға сататуғын едик. Олар усы билетлерди сатып алатуғын еди. Оннан жыйналған пулға дәптер, түр қәлем, ең үлкен саўғамыз китап сатып алып, жеңимпазларға саўға етип беретуғын едик. Мен ҳәрдайым биринши орынды алып, китап алатуғын едим. Көшемизде орын алғанлар қоңсы көшелер жарысатуғын едик. Аўылда орын алғаннан соң, қоңсы аўыллар менен де жарысатуғын едик. Олардың барлығында мен биринши орынды алатуғын едим», - деди ол қосықшылыққа кирип келиўине түртки болған ўақыялар туўралы айтып.
Сахибжамал Есемуратова
