Қанлыкөлде «Жаслар қүни» қалай белгиленди?

30-июнь – «Жаслар күни» Қанлыкөл районы аймағындағы «Арба» этномәдений дем алыў орайында, район ҳәкимлиги ҳәм Өзбекстан Жаслар аўқамының районлық Кеңеси менен биргеликте «Жаслар сейили»нде көргизбе шөлкемлестирилди, деп хабар берди kanews.uz.

Көргизбеде район аймағындағы жас исбилерменлер, фермерлер ҳәм өнерментлер ислеп шығарған өнимлери менен қатнасты.
«Мен ҳәм Жаслар аўқамы» акциясында викторина сораў жуўаплары, асфальтқа сүўрет салыў бойынша таңлаўлар өткерилди.

Соның менен бирге райондағы «90-жыллар мүзейи»ндеги ашық есиклер ҳәптелигинде билимлендириў мекемелери оқыўшы жаслары мүзейди тамашалады.

«Бахытлы» дем алыў паркинде шөлкемлестирилген байрам кешеси Өзбекстан Республикасы Президенти Ш.Мирзиёевтиң Жасларға жоллаған байрамы қутлықлаўы менен ашып берилди ҳәм 2017-2018 оқыў жылы даўамында сондай-ақ, байрам илажларында белсенди қатнасқан жасларға «Ҳүрмет жарлығы» менен баҳалы саўғалары тапсырылды.
«Жаслар күни» байрамы районлық мәденият тараўы хызметкерлериниң байрамға арналған гала концерти менен даўам етти.