Криштиану Рональду узоқ муддатга ўйинлардан четлатилиши мумкин

Мадриднинг «Реал» клуби ҳужумчиси Криштиану Рональду «Барселона»га қарши учрашувда (3:1) қизил карточкага лойиқ кўрилди. Учрашув бош ҳаками Рикардо Де Бургос Бенгоэчеа Рональдуга голни нишонлаш вақтида футболкасини ечгани ва рақиб жарима майдонида симуляция ишлатгани учун икки марта сариқ карточка кўрсатди. Иккинчи сариқ карточка кўрсатилган вақтда ўзини тута олмаган Рональду ҳакамни туртиб юборди. Маълумотларга кўра, Испания футбол федерацияси португалиялик футболчини спортчиларга ярашмаган ҳаракатлари учун узоқ муддатга ўйинлардан четлатиши мумкин. Дисквалификация муддати 4 ўйиндан 12 та ўйингача бўлиши мумкин. Аммо, унинг олдиндаги бўлиб ўтадиган 4 та ўйин, яъни: «Барселона»га қарши жавоб ўйини ва Испания Ла Лигасининг «Депортиво», «Валенсия», «Леванте»га қарши учрашувларида жамоага ёрдам бера олмаслиги аниқ бўлиб турибди.

Ислам Матеков.