Телефон ямаса ҳәзирги заманагөй смартфонларды зарядлаўдың да өзине тән тәртиби бар. Бул тәртиплерди бәрқулла ядыңызда сақласаңыз, телефоныңыз сиз ушын көп ўақыт бузылмай хызмет етеди.
Адамлар телефонларын зарядлаў ўақтында көбирек қәтеликлерге жол қояды. Ақыбетинде бул уялы байланыс аппаратының бузылыўына алып келеди. Қәнигелер телефонды зарядлаған ўақытта бәрқулла итибарлы болыўға шақырады.
1. Телефонды азанға шекем зарядқа қоймаң. Әдетте, адамлар өзлери уйқылаған ўақытта телефонларын зарядқа қояды. Уйқыдан турғанда телефонның заряды толып турыўын ойлайды. Бирақ, буның қәўипли тәреплери бар. Телефон артықша заряд ақыбетинде қызып кетиўи мүмкин. Бул батареяға зыян жеткереди. Және қатты қызып кетсе, өрт келип шығыўы да мүмкин.
2. Автомобильди от алдырғанда (ходлағанда) зарядламаў керек. Автомобиль басқарыўшылар көбинесе автомобильдиң өзинде телефонын зарядлайды. Автомобильди от алдырмай турып, гаджетти зарядқа қойыўға болмайды. Себеби, мотор от алғанда телефонға зыян жетиўи мүмкин.
3. Заряд алып атырғанда «аўыр» бағдарламалардан пайдаланбаң. Телефонға көп күш түсиретуғын, көп зарядын алатуғын бағдарламалар болады. Бир ўақытта бир ямаса бир неше бағдарламалардан да пайдаланамыз. Зарядлаў ўақтында қандайда бир бағдарламадан пайдаланбаған мақул. Әсиресе, ҳәр қыйлы мобиль ойынларды зарядлап болғаннан соң да даўам еттириў мүмкин.
4. Зарядлаўшы үскенелердиң саз екенлигине итибар бериң. Базыда телефоныңыз дурыс зарядланбай қалыўы да мүмкин. Оған зарядлаў үскенесиндеги кемшилик себепши болыўы мүмкин. Себеби, зарядлаў үскенеси насаз болса, телефонды қыздырып жибереди. Және зарядлаўшы үскене де қызып кетип, өрт келип шығыўы мүмкин. Басқа биреўдиң зарядлаў үскенесинен пайдаланғанда итибарлы болыў керек.
Ислам Матеков.
Сайтымыздың телеграмдағы каналына ағза болың: https://t.me/karinformuz
