Усы жылдың 11-май күни Беруний районы «Дослық» МПЖ Матбуот көшесинде жайласқан еки қоңсы үйде өрт келип шықты.
Ўақыя орнына оператив түрде 6 өрт өшириў бөлимшеси жетип барған ҳәм олардың жедел ҳәрекетлери нәтийжесинде үйлердиң 200 квадрат метрлик майданы өрттен сақлап қалынған. Дене жарақатын алған ямаса қайтыс болғанлар жоқ.
Өрт өшириўшилер мәнзилге жетип барған ўақытта үйлердиң жоқары тәрепи өртенип атырған болған. Өрт ақыбетинде көшедеги 25-жайдың 60 квадрат метрлик майдандағы жоқары тәрепи ҳәм үй мебельлери, сондай-ақ, 27-жайдың жоқарғы бөлиминдеги 30 квадрат метрлик қурылыс конструкциясы өртенип кеткен.
Өрттиң келип шығыўына 25-жайдағы электр сымларының қысқа тутасыўы деп болжанып атырған болса, оның қысқа ўақытта қоңсылас жайға өтип кетиўине жайларды қурғанда өртке қарсы аралықты есапқа алмаў ямаса өртке қарсы дийўаллар қурылмағаны себепши болған.
Ҳәзирги ўақытта материаллық зыян муғдары анықланбақта.
Ислам Матеков.
Сайтымыздың телеграмдағы каналына ағза болың: https://t.me/karinformuz
