11-13-октябрь күнлери Ташкент қаласында самбо бойынша өспиримлер ҳәм жаслар ортасында өткерилип атырған жәҳән чемпионаты өз жуўмағына жетти. Оған дүньяның 40тан аслам мәмлекетинен күшли самбошылар қатнаспақта. Жарыс жуўмағына муўапық, өзбекстанлы самбошылар улыўмалық есапта 4 алтын, 8 гүмис ҳәм 15 бронза медалды қолға киргизди.
Жәҳән чемпионатына Қарақалпақстаннан жәми 6 қыз қатнасып, олардың барлығы өз салмақ категориялары бойынша жақсы нәтийжелерге еристи. Атап айтқанда, Умида Джуманиязова бул жәҳән чемпионатында 48 кг. салмақ пенен қатнасып, финалда Самбоның ўатаны есапланған Россиялы қарсыласына ҳеш қандай имканият қалдырмай сыйлы биринши орынды ийеледи. Сондай-ақ, Нөкис олимпия резервлери колледжиниң оқыўысы Несийбели Оразбаева 60 кг салмақ пенен, Индира Елмуратова 64 кг салмақ пенен қатнасып гүмис медалды жеңип алыўға еристи.
Гулсимай Бегдуллаева 44 кг салмақ пенен, Махигүл Комилжанова 70 кг салмақ пенен қатнасып, бронза медалды жеңип алды.
Қызлардың жеңимпаз болыўында тренерлери Байрам Досбергенов, Махсуд Пирниязов, Сансызбай Юсупов, Анвар Атахановлардың үлеси айрықша екенлигин атап өтиў керек.
Сахибжамал Есемуратова
Сайтымыздың телеграмдағы каналына ағза болың:
https://t.me/karinformuz
