Усы жылдың 21-июнь күни Жер жүзиниң халқы қызықлы астономиялық ҳәдийселердиң бири – Шеңбер тәризли қуяш тутылыўын бақлаўы мүмкин.
Бул тутылыў толық түрдеги Шеңбер тәризли тутылыў болып, тутылыўдың толық фазасында қуяш бетиниң 99,4 процентин қурайды. Қуяш тутылыўы толық фазасының даўамлылығы 38 секундқа тең болады. Бул ҳаққында Өзбекстан Илимлер академиясының Астрономия институты хабар берди.
Бул астрономиялық ҳәдийсени Африка, Арабстан ярым атаўы, Евразия, Япон ҳәм Малай архипелагы және Австралия аймақларында жайласқан 111 мәмлекетте бақлаў мүмкин. Усы мәмлекетлерден 14 мәмлекетте толық түрдеги Шеңбер тәризли қуяш тутылыўын бақлаў имканияты бар.
Өзбекстан Республикасының барлық аймақларында Қуяш тутылыўы үлесли түрде бақланады.
Қуяш тутылыўы ең үлкен нәтийжеге ерискен ўақытта Қарақалпақстан Республикасында қуяш бетиниң 39 процентинен 50 процентине шекемги болған бөлеги Ай тәрепинен тосып қойылады.
Ислам Матеков.
Сайтымыздың телеграмдағы каналына ағза болың: https://t.me/karinformuz
